هالبوست نقول تحميه وسوالف..

طبعًا انقطعت غصب عني بسبب هالوورد بريس وحركتهم البايخه معي..وماراح احط كل اللوم عليهم..بصراحه ماكنت متحمس اكتب ولا كان عندي رغبه بالكتابة..مادري ليش بس كذا كنت احس اني بفترة نقاهة او شي زي كذا..لكن للإسف ضرتني اكثر من نفعتني هالنقاهة

اشياء كثيره تغيرت بحياتي هالكم شهر الي راحوا..افكار كنت متمسك فيها تغيرت..علاقات خفت مع ناس وزادت مع ناس.

ببدأ بالأقدم للأحدث..

اول شي انهينا السنة الأولى من الجامعة..على خير نقول بما اني الحمد لله ماحملت ولا مادة الا ان معدلي نزل بشكل كبير مره واثر على نفسيتي كثير..وماراح احط اللوم على الدكاتره مثل باقي الشباب الي معي طاحت معدلاتهم..اعترف اني اهملت بشكل كبير المستوى الثاني..وغياب كثير..مادري ليش مع اني احب تخصصي كثير مره ومتحمس بقوة له..لكن مادري هل هو الغرور الي صابني وخلاني اتهاون لهالدرجة ولا هي عين حسب ماوردني من كم واحد من الشباب..معدلي طبعًا كان المستوى الأول 4,30 تزيد او تنقص بشي بسيط..لكن بعد المستوى الثاني نزل بقوة لدرجة اني استحي اقوله بصراحه.

طبعًا على بداية المستوى الثاني..دوامي صار مسائي..واكتشفت ان الدوام المسائي جدًا ممل وسخيف,كنت إذا جيت احيانًا احس بتكه كبيره بصدري وضيق تنفس واحس ماطيق نفسي ولازم اطلع وصارت كثير طلعاتي من المحاظرات غصب عني..ماقدر اجلس واحيانًا كنت القى تشجيعات من بعض الشباب يقولون خل نتغدى ولاحقين خير على المحاضرات وكنت اطلع مهب اهمال الا اني احس بتكه ومن جد لازم اطلع..بعد فتره لاحظ علي واحد من الشباب دارس معي المستوى الأول لكن ماوفقه ربي وشال معه اغلب المواد فـ ماكان يحضر محاظرات معي..شافني مره راجع ومعي كوب الكولا من ماك قال وش فيك محمد؟ وراك خربتها..كان يمشي مع زملاء برضوه وكلهم وافقوه وبعبارات قذره بعضهم..:D لكن قلت مادري والله احس بتكه..يوم قلت له كذا حسيت وجه كش شوي..وتغير لونه طبعًا انا اسكت ماقلت شي رغم اني استغربت قالي بعد خمس دقايق وكان باقي لي محاضره بس ماكان عندي نية احضر قال محمد تعال ابي اكلمك بموضوع بيني وبينك؟ طبعًا انا قلت على طول لا معليش انا مانيب راعي هالخرابيط وانا انسان مستقيم وحركاتكم ذي ماحبها..طبعًا كنت امزح بخفف من وضعه وكنت ادري انه يبي ينصحني..ضحك وقال تعال طيب ويصير خير..مافيه شي بالغصب ياقلبي,مشيت معه بعيد شوي عن الشباب قال اسمع..انت ووجهك مهب كل من سألك تقوله عن معدلك كم..قلت وش فيها..قال فيها ياحمار ان ناس من شعبة ثانيه جايين يقولون لي كم معدل محمد؟ قلت مادري اسألوه انتم مايعلمني اصلاً..هذا غير فلان وفلان وفلان من شعبتنا سأليني عنك..قلت طيب عادي كل العالم تجيب هالمعدل تراه مهب 5 قال شف ماحد جاب فوق الأربعه من قاعتنا الا اربع انت وولد عمك..وفلان وفلان..طبعًا اسكت وخليته يخلص نصح وكذا ووعدته اني بعدل وضعي ومشيت وما أعرت اهتمام للي قاله..بعدها بيومين كنت طالع من الجامعة وكان علينا بعد يومين اختبار والمادة كانت listening طبعًا الحمد لله ما أواجه مشاكل مع هالمادة بحكم الأفلام والمسلسلات الي اشوفها من يوم اني في الأبتدائي..كنت امشي انا وكم واحد من القاعة..وشايلين هم المادة قلت انا تراها listening سهله ياعيال..قال واحد..اية مهب كل الناس مثلك ومثل ولد عمك يجون مافتحوا الكتاب وتاخذون الفُل مارك..طبعًا انا على طول خطر ببالي الي نصحني قبل كم يوم..وحاولت اني اوضح اننا ماناخذ الا الي نستاهله واننا نذاكر مثلنا مثلكم بس اني كنت احاول اهون عليهم الوضع,رجعت للبيت وقلت لأمي السالفة..قالت الا وشوله يالمقرود تقعد تتكلم بمعدلك اسكت وبس قل الحمد لله وخلصنا..طبعًا استمريت بهالحالة لين قبل الأختبارات النهائيه..وكانت درجاتي مره نازله بالميد تيرمز وكل القاعة تتكلم عن معدلي واني اهملت وكذا..واشوى بديت احس ان نفسي بدت تهدأ وبديت اتعود على جو الجامعة وجت الأختبارات وشديت حيلي خوفًا من السقوط والحمد لله جبت درجات عاليه بالفاينل بأغلب المواد لكن ضرني الميد تيرمز كثير فـ اغلب المواد طلعت بها بـ”D” للإسف مع اني احب هالحرف الا اني هالمره صار مثل الكابوس لي..:S

انتهينا من المستوى الثاني وعدينا بدون اصابات مميته..ولله الحمد..وتعلمت الدرس لا تتكلم بمعدلك عند اي احد..بس الي تثق بهم وتعرفهم زين..ومهب بالضروره تتكلم بعد..:)

بدأ الصيف ومعدلي كان كل الي شاغل بالي..وقلت باخذ صيفي احاول ارفعه شوي وفعلاً تم كل شي زي ماخططت..واخذت لي مادتين والحمد لله عديتها بدرجات حلوه نوعًا ما..

..
من الأشياء الي تغيرت في هالصيف..الحمد لله رزقنا الله ببنت وسمينها “مشاعل” رغم معارضة الكثير لهالأسم..بس ماهتميت للمعارضات كونه يعجبني من كنت صغير..طبعًا امي تعبت اثناء الولادة ووصلت لمرحلة خطيرة ودخلت العناية..لكن الحمد لله الحين هي بأتم الصحه والعافيه.

ايضًا حاولت اخلص اجراءات الجواز او الجنسية الأمريكيه..لكن طلع الوالد الله يهديه مضيع شهادة الميلاد ولازم اطلبها من المستشفى من جديد..وراسلتهم وقالوا انه لازم اجي شخصيًا عشان اخذه وكذا..فقلت لعلها خيره..

بعدها بفتره سافر عمي لأكمال الدكتوراه وكان متحمس معي لفكرة الجواز..وقال ان شاء الله بروح لهم واشوف وش عندهم..وللحين ماراح وانا ما طلبت منه مره ثانيه ماله شهرين رايح قلت اخلي أوضاعه تستقر بعدين اقوله وان شاء الله ماراح يقصر.

–
صار كثير بعد لي اثر على نفسيتي جدًا وغير نظرتي لأشياء كثيره..لكن افضل عدم الكلام فيها حاليًا على الأقل.

ايضًا صارت لي مشكلة مع منتدى كبير كنت ماسك فيه منصب اداري للإسف سياستهم دس السم بالعسل..ونيل المراد بطرق دنيئة..لا تناسب سمعة المنتدى ولا شعبيته ولا راح اذكر اسمه..مهب من حقي اني اتكلم عنهم لكن فعلاً نادم على السنين الي ضيعتها معهم.

امممممممممم..

نعم شريت بلاك بيري بعد بعد مابعت الآيفون بفتره بسيطه..الآيفون الي ماجلس معي الا يمكن اسبوعين او كذا بس مارتحت له ابدًا..وخدماته ماتناسبني..يصلح للناس الي تبي ابلكيشنز ويحبون الخرابيط هذي انا عن نفسي ماراح اركب شي عليه ولا اهتميت بهالنقطة..كل الي يهمني الأيميل..والفيس بوك احيانًا وتويتر ..وابي شي كيبورده حلو..لأني واجهت مشاكل مع الآيفون بالكيبورد اضغط رقمين مع بعض اصابعي عريضه بشكل غريب انا لا انيب متين ولا انا عريض بس اصابعي عريضه واكتشفت ان حتى اخوي الي بسادس ابتدائي اصابعة نفس الشي وناظرت لأصايع ابوي الا هي عاديه مثل العالم والناس..قلت وجع من وين اجل جايتني هالبلكات الي بيدي (لا تحسبوني متضايق من يديني..بالعكس من جد معجبتني..ولا بعد اتمناها اعرض شوي ) وتفاجأت بيد جدي من جهة ابوي ان اصابعة عريضه دريت اني طالع عليه رغم ان اصابعه اعرض بكثير مني بس تشبه اصابعي لحد كبير..وتمنيت ان اصابعي تعرض اكثر زيه..مادري ليش بس ابي يدي كبيره ليش مادري والحين وانا اكتب اضحك على الفكرة..وش الفايده من الأصابع الكبيره مادري بس كذا ماسكه معي ابيها تعرض زياده..:D
الشاهد اني ارتحت مع البلاك بيري اكثر بكثير من الآيفون وخصوصًا حركة الأيميل والكيبورد الي يناسبني من جد حاجه ثانيه..(الآيفون جهاز ممتاز مافيه شي بس مانسبني..لا يجوني الحين حقين الآيفون وياكلوني حي).

سجلت في نادي رياضي Fitness Time رغم ان اسعارهم من جد مبالغ فيها بس نقول ان شاء الله انه كويس..ببدأ ان شاء الله من بكرى..طبعًا تسجيلي بعد ألحاح من الوالده علي وعشان تنظيم السكر..ولا الحمد لله جسمي ممتاز ولو اسمن شوي بعد كان احسن..واحس النادي فاتحة خير علي خصوصًا فيه كثير من العادات السيئة صحيًا الي اتمنى اقدر اتركها قدر المستطاع..

–
طبعًا رحت للخبر ايام العيد وجلست عند الكورنيش نص ساعة بعدها صدمت وضاع وقتي بين المرور والمعارض والورش والشقه..وبعدها رجعت للرياض بعد ساعة من الوناسة..مع ذلك الحمد لله ماتحسفت ولا ضاق صدري بالعكس كانت تجربه ممتعة ومكلفه نوعًا ما..
–
تعلمت كثير بتعديل ستايلات المنتديات وتركيبها..ماوصلت لدرجة الأحتراف لكن سعيد فعلاً باني سويت شي بهالصيف غير العادة..ومسكت بحمد لله دعم فني لأحد المنتديات لأحد الأصدقاء..راح تكسبني خبره كبيره ان شاء الله..وعقبال ما أصمم أول ستايل كامل لي ببرمجه وكل شي..قريب ان شاء الله.
—

هذي كانت بس محاولة تنشيط للمخ وتجربة الكتابة من جديد اتمنى اني قدرت احمي شوي واتمنى انها خفيفه عليكم ولا تجيب الهم..بس وش نسوي استعادة اللياقة يبي له وقت شوي..

تحياتي للجميع..:)

لي اكثر من ثلاث او اربعة شهور احاول ادخل لوحة التحكم للمدونة وماقدرت اشوف التعليقات تجي وتبي موافقه ولا اقدر ادخل اوافق عليها..ارتفع ضغطي واحاول افتحها ومافيه اي فايده..

عاد جاني شي امس الا بالغصب بفتحها واحاول ومره رفض وارسل للدعم الفني حقهم واهاوش وكذا والمشكلة اقوى سحبه صارت بالعالم..وارتفع ضغطي بس قلت مش الوضع ياولد خل نصبر الا بكرى وحاولت والحمد لله دخل بعد المحاولة الخامسة عاد قلت انزل تدونية اقول للعالم اني بنقل للبلوقر واول مافتحها ان شاء الله راح احط لكم الرابط هنا..

وآسف للي مارديت عليهم المدونة ماكانت تفتح معي ابد ابد..آسف مرة ثانية..:)

طالع اصلي العشاء في مسجد الحي وتعودنا اننا نشوف الناس بعد الصلاة تقوم وتطلب فلوس وتقول انا عندي ابوي مريض انا عيالي انا ابي اسدد الكهرب ويا أهل الخير ساعدوني ومن هالكلام المعروف (بغض النظر عن حقيقة حالة محتاج او لا) وبعض الناس تعطيه تبي الأجر من الله سبحانة وتعالى..

اليوم الي صار شي غريب وحز بخاطري وضيق صدري..كالعادة قام شخص يطلب المساعدة ما أدري بالضبط وش الي قاله بس الي متأكد منه انه يطلب مساعدة اهل خير (بغض النظر عن حاجته او عدمها,لأننا نعلم ان بعضهم الله يهديه اخذها مهنة) بعد ماخلص جاء بيطلع من الصف الأول الا يوقفه رجل خلف الأمام للإسف انه كان ملتحي وقال عطني الورقة مثل الي بيتأكد منه او شي مثل كذا رغم ان حركته ماكان لها داعي ياخي ماتبي تعطيه لا تعطيه بس لاتحرجه..وللإسف ماتوقف الأمر عند هالحد اخذها وهاوشه وزجره وقال رح انت نصاب واخذ الورقه الي حسب علمي انه يقول انها اثبات من المحكمة وحطها بجيبه والسأل المسكين مايدري وش يقول انحرج جدًا وقاله يالله رح..ومر من جنبي السأل ووجهه منزله للإرض وماسك طرف شماغه ويمسح دموعه هنا انا حسيت برجفة من راسي الى رجلي حسيت رجلي ماقدرت اوقف عليها عشان اطلع من المسجد جلست شوي وانا ماستوعبت الي صار.

والرجال يوم دخلها في جيبه حس ان الناس تناظره وكأنهم يقولون هذا مهب اسلوب قام طلع الورقة ورفعها للعالم وقال هذا نصاب لاتصدقون يا أخون الناس هذي ..الأشكال هذي والنوعية هذي..حسيت انه بكلامه كأنه يتكلم عن حشرة مهب انسان يمكن تدخل النار بفعلتك الي سويتها فيه,وكمل هذي الأشكال نصابه ويأكلون اموال الناس بالباطل وشوفوا مافيه اي اثبات انها من المحكمة مافيه طبعة المحكمة فوق مافيه اي ختم رسمي كلها ختوم مزوره ولا فيه رقم تسلسلي للورقة..فعلاً عذر أقبح من ذنب ياخي ماحد طقك على يديك وقال عطه فلوس ماحد قال انه صادق ان شاء الله انه اكبر نصاب بالدنيا ماتنهره وهو جاي يسأل حرام ولا تدري عن حالة الرجال ولا عن ظروفه واسلوبك كان خطأ مليون بالمية وكان جنبه ولده ماتجاوز عشر سنوات كان يناظر ابوه بنظرة استحقار وكأنه يقول وش سوى لك المسكين يوم انك تحرجه كذا..حتى الطفل كان يحس بالأحراج من الي سواه ابوه واستمر الرجل بالكلام والتجريح حتى بعد طلوع السأل..الأمام طلع نظارته ولبسها وقاله عطني الورقة بس يبيه يسكت قام رمها عليه بكل عجرفه واخذها الأمام ويقرأ انا قمت بطلع وادور الي سأل كان معي عشره او عشرين بعطيها اياه بس ماحصلتها مشى على طول من الي صار له..والله ما أنسى شكله وهو يمسح دموعة ومنزل راسه.

أنا ماقول هنا ان كلهم صادقين او اي واحد تشوفونه عطوه لكن حرام زجر السأل وحرام انك تفشله كذا قدام الجماعة والناس كلها وبأسلوب حقير وعجرفه..ماتدري يمكن تصير انت بيوم من الأيام مكانه قال تعالى: ( وَوَجَدَكَ عَائِلاً فَأَغْنَى ) الله سبحانة وتعالى هو الي عطاك كل شي وهو قادر انه ياخذ كل شي وقادر سبحانة يحطك بمكان هالمسكين ويحط المسكين مكانك الأن ويزجرك كيف راح يكون شعورك وقتها ؟.

والي يقول نصابين وبس يأكلون اموالنا بالباطل ياعزيزي يا أخي الكريم من الي ضربك على يدك وقال عطه من الي قالك اي واحد تشوفه عطه خمس مية ريال ولا حتى ريال,اسولف قبل فترة مع امي عن موضوع الحاجة والناس المحتاجة..قالت انها تعرف وحده من زميلاتها اتصلت عليها حرمة تعرفها قالت انا عندي اربع بنات ولو بس ساعتين راح نموت من الجوع لو مالقيت شي راح اطلع بناتي مع شباب بس عشان يجيبون لنا شي ناكله أم أم وصل بها الحال انها تضحي ببناته عشان لقمة أكل عشان بس مايموتون وتضحي بشرفهم هل هذولا فعلاً يأكلون اموالنا بالباطل..حالة هالعائلة الأن افصل تكفل بها فاعلين خير ويصرفون عليهم الله يجزاهم خير ويعطيهم الصحه والعافيه..فلاحد يقول ان مافيه ناس محتاجه

اذكر قبل فترة قالت امي بناخذ بطانيات واغطيه للنوم لعائلة تعرفهم ورحنا ودينها يوم دخلتها عليهم مع الباب الأطفال ماقد شفت مثل ابتسامتهم وفرحتهم فيها ولبسهم كان متقطع وباين عليهم الحاجة وقاموا يناقزون ويحببون راسي والله يجزاك خير والصغير يقول انا باخذ الحمراء والثاني يقول الزرقاء لي ويضحكون..شوفوا اطفال اطفال وحسوا بالسعادة عشان بس غطاء للنوم وحليب شوكلاته وشيبس جايبه لهم هذولا مهب محتاجين؟.

مادري موضوع جر موضوع بس فعلاً حركني المشهد الي شفته تو في المسجد وحسيت بقهر..وشلون اجل السأل وش المشاعر الي حس بها الله يكون بعونهم المحتاجين ويساعدهم..ويخلصنا من هالأشكال الي تتصرف بطريقة خطأ وتحرج الناس وتجرحهم ولا همهم شي..مادري عنه ممكن مسؤول ولا شي ولاعنده خبر عن الناس ذي او الشخص هذا بس اسلوبه ماكان اسلوب شخص يملك مشاعر وعقل يفكر به ابدًا كان متعجرف جدًا ووقح لأبعد درجة,لو بيدي اني لا أتوطئ ببطنه لين يقول ربي الله.

ماقول الا حسبي الله ونعم الوكيل..

Deeno

—————

(1)

عبدالله: تدري يا خالد والله أني اكره خالي فلان ولا أواطن عمي فلان الله يقلعهم..مايخلون احد بحاله..يوووه عاد يجيك عمي علان..هالأدمي ممُل ويحسب نفسه ظريف وانا ماقد شفت اثقل من دمه..

خالد: يوه شفه عمي فلان وصل

عبدالله:ياصبر الأرض

خالد:هلا ياعم وامووه (يحب راسه) اقلط حياك الله

وبعده يجي عمه علان وخاله فلان ويتكرر المشهد ويحب روسهم ويقلطهم.

(2)

جالس انتظر الضيوف يوصلون..هذا عمي صالح وصل نزل سلمت عليه نزل راسه عشان احبه حبيت راسه وقلطته..وانا احب راسه اقول وش يحسون فيه هالعالم..حبة الراس تعني الأحترام!!.

–

عندنا عادة غبيه وهي تحب راس عمك او خالك..انا ماقول حُبة الراس غلط بالعكس بس ماتربي ولدك انها شي واجب تربيه على انها تعبير عن الأحترام..كم شخص وكم شخص احب راسه ولو انها مهب من عاداتنا الغبيه  كان بصقت على راسه لأن فعلاً فيه ناس مايستحق الا البُصاق..من وجهة نظري او المبدأ الي امشي عليه حُبة الراس ماتدل على الأحترام ابد لأننا مجبورين عليها

عشان كذا جدي وجدتي احب راسه(الواجب الغبي)..وتعبير عن حُبي لهم واحترامي ارفع يمينه واحبها لأنه شخص فعلاً يستحق مني كل الأحترام والتقدير لكن اني أُجبر اني احب راس شخص معين علشانها (عادة) للإسف الحين بعض الأشخاص يحسب انه بفرضه علي اني احب راسه انه احترام وهو مايدري اني استحقره على هالفعل..

كلامي الي فوق كله عن الشخص الي ينزل راسه عشان تحبه له..اما الشخص الي ماينزل راسه ولك حرية التعبير عن احترامك فهذا موضوع ثاني ومختلف تمامًا..

صرت كثير ناس احترمهم واقدرهم ماعد احب روسهم بسبب مابي يختلط علي موضوع الواجب وموضع الأحترام فـ اخلي قُبلة الراس روحيه من روحي لروحه وأكن له كل الأحترام..

وهذي عادة قبيحة اخرى من العادات القبيحة الكثيره موجوده بمجتمعنا لللإسف..

Deeno

واشكر كل الي سألوا عني ..:)

—————————-

قبل ثلاث ايام تقريبًا او اربعه جالس الساعة ثنتين مادري ثلاث الليل على الكمبيوتر كالعاده..وفجأة رقم غريب يدق رديت كان صوته هادي جدًا كانه منسدح او مسترخي..

هو:هلا

انا:مرحبا..هلا وغلا

هو:اخبارك؟

انا:بخير يامال الخير..

هو:علومك؟

انا:بخير..من معي اخوي؟

هو:وش اخبارك؟<عادها

انا:بخير الله يسلمك..بس من معي؟

هو:

انا:اخوي من معي؟

هو: بس حبيت اسلم عليك واشوف اخبارك

انا:الله يسلمك

هو:يالله مع السلامه

انا وعلامات الأستفهام والتعجب فوق راسي:مع السلامه

وسكرت ورجعت للمسن طبعًا ما اعطيت المكالمه اي اهتمام..شوي تجيني رساله اخلي الصور تتكلم..

ركزوا على النقظه الي بعد احبك..بيعلمني انه جاد يعني:d

انا اول الموضوع احسبه ولد عمي يتميلح لأن قبل يومين كنت اقوله وش المشكله ياخي بالـGay اهم شي الحب ورفعت ضغطه شوي فـ قلت يمكن مسوي بيردها لي:d

الا هنا وانا احسبه يتميلح..:d

ومازلت احسبه يستهبل وكان ردي بشوف وش عنده هو يستهبل ولا صدق..:d

هنا عرفت ان الموضوع صدق مهب استهبال..

طبعًا انا ضحكت لأن السالفة ذكرتني بشي ولا المفروض ماضحك بس مع اللخمه ضيعت:d

يالبيه على الي خاقين معي يانااااااااس:$..من جد اسلوبه رهيييييييييييب:d

هنا قلت خلاص خل نخلص منه ياشيخ مالها داعي اتورط زياده الحين..

مسكين والله مسكين..يقول واحد مثلك ماعنده علاقة حب وش دراك عندي علاقه ولا ماعندي:S ..ولو بحب احد مانيب حابك انت وخشتك:d

‘

طبعًا انا مارديت عليه قلت لو برد واقول شي عقب رسالته ذي بيحسبني اتغلى واني ابيه:d <مشكله الي صدق روحه بنت:d: d: d: d

الحين كلنا نعرف سالفة الأعجاب الي عند البنات والخرابيط ذي واخبر عندنا ايام المتوسطه والثانوي هالحركات وولفي ومادري وشو اشياء تضيق الصدر..لكن ماتوقعت ان فيه زي كذا والحين..وخصوصًا اني اعرف نفسي مانيب مزيون يوم انه يحبني كذا..بس إذا هذا حال الأمه الحين وش نرجي منهم

الله يصلح شباببنا وشاباتنا وشباب المسلمين يارب..:)

Deeno

خالد: محمد..شف مو هذاك عبدالله الي مع جمعية مكافحة التدخين..الي يقدم ندوات عنه خلال اسبوع التوعية عن التدخين؟

محمد: الا والله هو مشينا نسلم..لحظة..لحظة..يدخن هو؟شلون يدخن وهو حق مكافحة التدخين؟امس ملقي محاظره عن اضراره معقوله؟

هشام: اية عبدالله انا اعرفه زين,  واحد من الجماعة..ما بدأ يدخن الا بعد ماتوظف في مكافحة التدخين!!!

1.2

ناصر: يالله والله اني مضغوط مره مره..لازم اروح اصلح اليوم السخانة لها اسبوعين متعطله..ولازم اجيب عامل يصلح لمبات الحوش لها برضوا سبع ايام متكسره..ولازم اودي ولدي للحلاق ولازم اشري اغراض للبيت المفروض اني شاريها من يومين..وعندي كتابة اسأله للطلاب..وتصحيح..

ثامر: على طاري الأسئلة وش تدرس انت؟

ناصر: ادرس مادة اسمها “كيف تنظم وقتك”!!

1.3

منزل بالشارع الأول:

بكاء وصراخ ونحيب..وجو يسوده الكئآبه..هذي ام صالح تنشج محاولة الصمود وتبكي بهدوء فهي تحاول البقاء صامده فقد فقدت للتو بكرها “صالح”

منزل بالشارع الخامس:

بكاء وصراخ..جو يسوده الفرحه والمرح..هذي نوال تدمع دموع الألم الممزوجه بالفرحه..فقد انجبت ابنها البكر ويقول خالد”الوالد” بسميه على أبوي “صالح”

هذه هي سنة الحياة!!

—–

شي بنفسي من فتره وكان ودي اكتبه..:)

Deeno

لكن اليوم رحت لمكان ولا لقيت الي رايح له بس حسيت بوناسه يمكن اكثر شي اسعدني خلال الفتره الي راحت اني ماحصلت الي رايح عشانه..صليت المغرب ورحت لجدتي كالعاده ويوم وقفت وطفيت السيارة وانا امشي مابعد دخلت للمستشفى اتصل علي ولد عمي الصغير ورديت قال ان أمي نورة طلعت..قسم بالله على اني ضربت مشوار الا اني حسيت بوناااسه مايعلم بها ربي..

الحمد لله اليوم نوور بيت جدي برجعتك يايمه وياجعل ماجاك تكفير وياجعلها آخر الأحزاان يارب..ماتشوفين شي يانور الدنيا..

ملاحظة* التدوينه السابقه اغلقت خاصية التعليق لرغبتي بأن تكون الدعوة لجدتي في ظهر الغيب..وشكرًا جزيلاً لكل الي دعو لجدتي..(L)

أمس العصر تفاجأت امي بأن جدتي لأبوي بالمستشفى للمشاكل التي تعانيها في ظهرها..المشكلة انها في المستشفى من يومين..ولا وصلني خبر ولا وصل لأمي خبر ..الصراحة من جد شلت على أبوي يعني ليش ماعلمني بنهاية الأمر تراها جدتي يعني وتهمني..يوم جاء ابوي من الدوام بالليل سألته ليش ماعلمتني ان جدتي بالمستشفى..والي تفاجأت منه ردة فعل ابوي..”قال جدتك؟أمي؟ وش فيها؟” اكتشفت انه حتى هو مايدري عن الموضوع وكان جدًا وجهة متضايق..يعني مافكروا يعلمون اخوهم؟ مهما كانت المشاكل ولا حبهم له او كرههم له يضل اخوهم الكبير وله حق عليهم ولازم يدري هذي أمه يعني..

مادري متى بيعتبرونا من العائلة الكريمة..:(

كل الي ابيه منكم دعواتكم ان الله يقومها بالسلامة..وخصوصًا دعواتكم لها بهاليوم الكريم..:)

Deeno

“الله بشرك بلاني..وانت بالخير إبتلاك“

المعروف ان الإبتلاء هو البلوى يعني  مصيبه او مشكلة تواجه المبتلئ بكذا مانقدر نقول بالخير ابتلينا..لأن البلوى شر او مصيبة او مشكله فكيف الواحد يقول ابتلينا بالخير؟

مادري هل بالنسبة لنا اهم شي يكون الكلام واضح وله معنى ولا اهم شي تكون مصفوفه بشكل جميل ويطرب بدون الأنتباه للمعنى؟

2

“تذكر خالد؟”

“منهو خالد؟”

“ذاك القزم”

“ااااايه,بس هذاك مو قزم قصير بس”

“باللهِ,وش الفرق يعني؟!”
هذي محادثة دارت بيني وبين زميل لي بالكلية..دايم مانسمع من الواحد إذا بيوصف شخص قصير يقول “قزم”..القزم هو الي مخلوق بعيب خلقي ويكون قصير بشكل ملحووظ جدًا يعني يوصل لركبة الشخص الطبيعي اما الشخص الي يكون قصير يكون اقصر بقليل من الطول المعتاد..لكن كل شي تمام,والأقزام معروفين بأشكالهم الغريبه ورؤوسهم الكبيره مقارنة بأجسامهم..الله لا يبلانا ويعينهم..

انا ماعندي ألمام كامل عن موضوع الأقزام لكن اكيد فيه فررق كبير الى متى ماراح ننتبه لهالفروق بالمفردات..؟

3

اتصور اني بوافق..اتوقع اني بوافق

اتوقع انه طويل وعريض وابيض..اتصور انه طويل وعريض وابيض
كثير بيقرونها وبيقولون وش الفرق تستهبل انت؟

بقول الفرق الأول انه يتوقع انه بيوافق شي معنوي ماهو حسي وخطأ انه يقول اتصور لأنه زي ماقلت شي معنوي وشي مانستخدم معه مصطلح التصور..

اما الثاني شي من الصفات شي حسي يعني راح تشوفه بعيونك ماهو شي معنوي نفسي..

..

مادري إذا قدرت اوضح الفكرة من قرقي الي فوق والخربطه لكن الي بوصل له ان فيه مفردات ومصطلحات كثيره نستخدمها وهي خطأ ولا ننتبه لها لأننا بس تعودنا عليها وماتعودنا نفكر بالكلام قبل نقوله ولا نحلله..طبعًا الي قلته فوق امثله بسيطه فيه غيرها الكثير فكروا وبتلقون ان اغلب كلامنا خطأ بخطأ..

Deeno

قال بكم شريتوا هذي يقصد الثوم..طبعًا ولد خالتي مد الكيس يقول تبي؟يحسبه يبي مادرى انه جاي بينصح..:D قال لا وش ابي فيها انا اسألكم بكم شريتوها قلت انا ثلاث بعشرة وقال ولد خالتي بثلاثه(يقصد الحبه) قال لا لا انا اقصد كل الي شريتوه انا طبعًا من اول ماجاء وانا داري انه يبي ينصحنا ولكن اسلوبه ماعجبني قلت كل الي شريناه بعشره بان عليه هو انه ارتبك شوي اعتقد انه كان يحسبنا شرينا بـ500 ريال وانت طالع..قال طيب هل تدري انه بهالعشرة ريال تقدر تعشي بيتين كاملين بعلبتين فول..قلت انا صحيح لم ارغب الصراحة بمناقشته لأسلوبه الغريب الي ماعجبني ابد ونصحه الي كأنه يهاوش مو ينصح..طبعًا قال لا تبذرون الفلوس على اشياء ماتستاهل ومن هالكلام ومشى يوم مشى اتجه قدام وانا اتابعة بعيني واناظر فيه سيارتين قدام وحده كورية ماتتعدى الـ30 ألف جديده والثانية تتعدى الـ350 ألف قلت لولد خالتي شف شف..شوي الا يفتح السيارة الي بـ350 ألف..انا هنا مو عشان احسده لكن استغربت كيف ينصحنا بالطريقة الي تو وهو معه سيارة بـ350 ألف ما يسمى هذا تبذير وش فرق السيارة الي بـ40 ألف عن السيارة الي بـ350 ألف مو كلها توديك لمشاويرك مو كلها فيها مكيف..انا هنا اتكلم من ناحية المنطق الي تكلم عنه قبل شوي وكيف اننا نبذر ياخي الحياة مو انك تمسك فلوسك ولا انك تبذرها الواحد يشتغل ويكسب الفلوس عشان يستانس مو يحاسب كل قرش من وين يطلع ومن وين يروح طبعًا ماننسى الصدقة فهي سر بقاء وبركة المال بس هل معناه اني ما ابسط نفسي؟ هل معناه اني احاسب كل قرش وين يروح وين يجي ياخي الدنيا فانيه الفلوس ماراح تروح معك للقبر ماراح يروح معك الا عملك وبس..الواحد لازم يستانس ويعيش حياته..

لا احد يحسبني ضد النصح والتناصح بالعكس هذا سر استمرار الحياة السعيدة بس بالأسلوب الجيد والمنطق الجيد..وللإسف الحين كثير ينحسبون على الملتزمين ويسيئون للملتزمين وللدين اكثر من انهم ينفعونه.

Deeno